Oleh Muhammad Baran
Tite ata ribu ratu lewotanah Labala, ake me onem kuran. Nuan sare hau maje tite kae, musim alus dai geppa tite kae. Pemilu (Pemilihan Umum) 2014 pi daheka. Te peten pile pepa labala ene-opu tou. Ne gerewa teti lango bela Peten Ina. Te inga sogaro ne gelekka lewo titen.
Tite ata ribu-ratu Tanah Leworaja, pai te onek tou, kirin ehe taan soga nare lewotanah dibelola. Tite pile ake ne nalan bei. Te Soga ama Hadi Abdullah gere jadi ata bele. Ne soga lewotanah narene, ne biti lewo Labala makene.
Partai Persatuan Pembangunan (PPP) nabe nuru tite lare, te gute berkah lewo labala, te hode keramah Leworaja. Gere ne tali rae, te gerie lewo, te gewaje tanah titen.
Ribu-ratu Tanah Labala, ake me onem kuran. Nuan sare hau maje tite kae, musim alus dai geppa tite dikae hena. Te peten pile Ama Hadi Abdullah.
Pai te koda-kirin tou. Pile Titen Tou, Nimun Tou, Lewo Tou, Nomor Tou. Pile-tada Ama Hadi Abdullah.
Ina e, ama e...
Rema pi ditukan kae,
ekan pi dilelaja kae.
tobo mehak kode pikir susah
peten lewo, pe maje-honik wekik mela hena take?
sudi tanah, pe toi-tonga wekik sare hena take?
Lewotanah Labala...
susah nabe tuasa oh ina e...
payah nabe tagala oh ama e...
mio peten kame le take?
nuba-nara baran be tawa gere
ana-opu murin be bela dei
kode kame take ware
kiri kame kuran hena
Ina e, ama e...
puke ale ge, mio onem ditou hala?
dari ale ge, mio kirin diehan kuran?
pai te mupu limak
pai te dei hama-hama
ake uno-geni wekik
ake tebekke-geridi wekik
ake te mehak pana laran
Kame nuba murin onem nabe susah,
peten inak-amak rae lewo tobo.
Ina e, ama e...
Aran pira kai koi mio?
kame doan mio dilela.
koda pulo kirin lema kae.
kabe tena ate ne nette nai geppa mio?
rema pi ditukana kae,
ekan pi dilelaja kae.
kame anam moe tobo didoan-doan
aek ne lau ole wura dikae
peten lewo sudi tanah
lewotanah Labala titen (**)
Tidak ada komentar:
Posting Komentar